Act 25 | APZ | STEP | Fesɨtos hwaho kengo mta'ni ango Sisaliya i'mofaponto hwaho mokosyohumayo syohoso nomanto sɨkuno hufa'u sɨhune memjaofahonɨngki kako Jelusalemno sɨmentisofoho.

Acts 25

Poul kako yokumpohn'nyo lohofonto, Nje hungkuno Sisa yofe hwofilo'nnyo sohwo wonɨpa'nono ulɨmentisofoho.

1 Fesɨtos hwaho kengo mta'ni ango Sisaliya i'mofaponto hwaho mokosyohumayo syohoso nomanto sɨkuno hufa'u sɨhune memjaofahonɨngki kako Jelusalemno sɨmentisofoho. 2 A'amu tajo ango syoho'njo sohwanji a'amu Jutafe hwe engo sohwanji Fesɨtosɨ'njopo u'mantɨfi hofɨkoe hwasyo hungkuno Poulɨmne'no ulɨmentohofofoho. Hofɨko jomo yokumpohn'nyo ulɨmentohofi, 3 Kɨko nonefo'mahoji Poulɨmo Jelusalemno uhwajo. Ose ulontɨfi Poulɨmo honɨngkanopo fonjosyane'entɨfi nto mtito'mentohofofoho. 4 Ose ulahonɨngkofi Fesɨtos ulɨmento, Poul ango Sisaliya sopo impo'angomo humaho. Oso hopo sopone'no we'enepi wamne'no yohono. 5 Poul kako wonyo imentiso'manji sekwoe hwe engo sohwa ngko'nji nowehwasi osopo wolantanoho. Ose ulɨmentisofoho.

6 Fesɨtos Jelusalem nohumanto nom'ne sɨkuno aho fehohnjo hopi'nono nom'ne mta'ni hufa'u sɨhunetɨkeno sɨkuno aho hufa'u hopi'nonohinotɨkeno memjaofahonɨngki hofɨko Sisaliya'no umentohofofoho. I'mofapontɨfi mo'nɨngkanta Fesɨtos kako ango hungkuno ito'no melɨhwajiyo'ne somo nohumanto kako Poul wapono lonto lɨhwatɨmentisofoho. 7 Lɨhwojahonɨngki Poul noswahonɨngki a'amu Jelusalem mta'ni pmmentohofo sohwa Poulɨ'njopo nolohofontɨfi hungkuno tango'njo Poulɨmne'no lɨmentohofofoho. Hofɨko Poulɨmo wonyo imentohino hwosoho ko ulɨmentohofoso Fesɨtos kako hofɨkoe hungkuno somo ne motɨpe'mammentisofoho. 8 Poul hofɨkimo aku ulɨmento, Ngko honɨngkano wonyo mmofe'njo hwo'nyoho. Ngko a'amu Jutafe honɨngkano hungkunoso mtɨhupeso awonoho. Ngko Anɨtuye ango engo somo wonyo imokiyoso awonoho. Hwe yofe engo'njo Sisa oso hwoe hungkunomo ngko hwotoho fiyoso awonoho.

9 Ose ulahonɨngki Fesɨtos kako a'amu Juta sohwamo afofo umokumonto yonto Poulɨmo ulɨmento, Kɨko huno pipi kiyohoho. Nakwo ango Jelusalem sopo nosɨhwasi osopo jɨje hungkuno ito'no melokuhwajɨmeso wopɨngtaho.

10 Ose ulohonɨngkahonɨngki Poul ulɨmento, Olo ango humale loso a'amu Loum sohwafe hungkuno ito'no melɨwojiyo angofoho. Oso'no olo ango olo huhwo lohwo nje hungkuno ito'no mefoholofɨhwajiyo'ne angofoho. Kɨko huno moi'wonoho. A'amu Juta somne'no wonyo mimmentohefoho. 11 Ngko wonyo honɨngkano imofontɨ'mtentesi oso wonyo hiso'no kɨko poyo pe'nyo ntɨfijoso hungkuno ane'njo nope'nɨ'mnesohilo. I oso'no oso hungkuno ntohofoso hwasyo'manji kɨko hofɨkoe ahomo noho'nanɨsyohotoho. Hwe yofe engo hwofilo'nnyo Sisa osohwo kako nje hungkuno upa'nono. Oso hiso'no ngko Loummne'no wawomne'no yohono. 12 Ose ulahonɨngki Fesɨtos kakoe a'amukaunɨsol syoho'njo sohwanji hnnontɨfi Poulɨmo ulɨmento, Kɨko Sisamne'no jɨje hungkunomo upa'nono ntohino so'no e'wano. Sisafepono fɨwano. Ose ulɨmentisofoho.

Fesɨtos kako Poulɨmne'no Akɨlipa sohumo ulɨmentisofoho.

13 Hwangku sohonta hwe yofe engo'njo hwaho mokosyohumayo Akɨlipa sohwo kako kakoe ape Mpenaisi oso'nji siko ango Sisaliya i'mofawenji Fesɨtosɨmo isamo uloho'mentisiyefoho. 14 Siko ango Sisaliya humentanɨngki sɨkuno pi'nɨngo memjaofahonɨngki Fesɨtos Poulɨmne'no hungkuno ole lutɨhwamento, Poul impo'angomo humentanɨngki Felikɨs musɨhutofe'njo ulɨko'ma'mentisofoho. 15 Ngko Jelusalem nosonji osopo nohumentanɨngko hwe yofe engo'njo tajo ango syoho'njo sohwanji a'amu Jutafe hwe engo sohwanji nɨ'mantɨfi Poulɨmne'no ntontɨfi ntɨmentohofi, Kɨko Poulɨmo ole uso, Jɨje wonyo imentohino so'no poyo pe'nyo. Ose uso. 16 Ose ntahonɨngkofi ulɨmentoho, Nakwo a'amu Loum sɨ'nwi oso yahino hiso ane'nwoho. Hwe fihwo a'amu nom'ne kakine'no hungkuno hi'njo sohwo kakoe sɨmanopo malohofe'njo yɨhwosi oso hungkunoso majo'manji oso hwe sohumo tohino siki muyanehwono. O'o, a'amu sohwo nom'nehumne'no hungkuno hi'njo osohwo kakoe hungkuno ulahonɨngkuhwoso'no hwe huhwo sohwo hungkuno aku ulososo oso honɨngkano wopɨngofoho. Ose ulɨmentohefoho.

17 Hofɨko ngko'nji pmmentɨhwone sohonta ngko mohontohumammentohefoho. O'o, mo'nɨngkanta ngko hungkunojo ango somo nohumanji Poulɨmne'no lɨhwatɨmentohefoho. 18 Ngko ole syafɨhu'mentoho, Hofɨko Poulɨmne'no honɨngkano wonyo so'no ulantɨfe'no yohofo. Ose syofɨsyahonɨngko hofɨko nolɨkofohumantɨfi wonyo ne so'no mujo'njo imentohofofoho. 19 O'o, hofɨko yoka ole wo'nnyo hwafoho. Poul hofɨkoe Anɨtumne'no honɨngkano songo inɨngkayo'ne tɨpema'mentiso so'nji hwe fihwo kakoe yofe Jisas osohwo poyo pe'nɨmentiso so'nji oso'no yoka ulɨmentohofofoho. Poul ulɨmento, Jisas songo humaho. 20 Oso'no ole syafɨhu'mentoho, Hungkuno hwapɨngo neso pipi syafɨhu'mnehono. Ose syafɨsyonji Poulɨmo ulohonɨmentoho, Nakwo ango Jelusalem sopo nosɨhwasi osopo jɨje hungkuno ito'no melokuhwajɨmeso wopɨngotaho. 21 Ose ulahonɨngko Poul ntɨmento. O'o, ngko impo'angomo nohumahm'mo tɨfi hwe yofe engo hwofilo'nnyo Sisa osohwo nje hungkuno ito'no melonɨhwajonoho. Ose ntahonɨngki ngko nje a'amu impo'angomjo mokosyohumayo sohwamo ulɨmentoho, Poul impo'angomo wohontohumano. Hwangku Sisamo uhwonyo'ne uhwatɨmonnoho. 22 Oso hungkunoso Akɨlipamo ulahonɨngki Akɨlipa ulɨmento, Olo hwe lohwoe hungkunoso upa'nɨmne'no yohono. Ose ulahonɨngki ulɨmento, Mo'nɨngkanta kɨko upa'nyo.

23 Mo'nɨngkanta Akɨlipa'nji kakoe ape Mpenaisi'nji siko hwapɨfe wokoso'njo wonyoangkafoso yahonɨngki hwe itokuso'njo a'amu yofe engo'njo sohwanji oso ango Sisaliya hwe engo sohwanji nopontɨfi Akɨlipa hiya'umo ipemotapontɨfi ango uhu'mokiyo sopo humentohofofoho. Nuhu'mokahonɨngkofi Fesɨtos Poulɨmo utɨmotapɨfe lɨhwatɨmentisofoho. 24 Nutɨmotopahonɨngkofi Fesɨtos ulɨmento, Hwe yofe engo'njo Akɨlipa sohwanji sekwo a'amu hopi'nono nakwo'njopo humalofo soku olo hwe lohumo uhwonɨmno. A'amu Juta Jelusalem mta'ango so'nji oloponta'ango so'nji olo hwe lohumne'no nje sɨmanopo lohofontɨfi nto ntɨmentohofofoho. Hofɨko joho mohm'no ntɨmentohofi, Olo hwe lohwo kako songo mohumanehoho. 25 I oso'no kakoe honɨngkanomne'no hungkuno upa'nonji wonyo iyoso'no poyo pe'nyo'ne so'no motɨpema'mmentohefoho. I kako ntɨmento, Sisa nje hungkuno upa'nono. Oseso ngko hungkuno nano mtitofonji kako Sisafepono waweno ulɨmentohefoho. 26 Ngko Poulɨye honɨngkano wonyo motɨpemaso'njo so'no ngko Sisamne'no iyoswo pipi mtɨ'mokumnehono. Oso'no hwe yofe engo'njo Akɨlipa kɨko'nji a'amu nom'ne humalofo soku ngko Poul sekwoe sɨmanopo utɨmotapohono. Sekwo kakoe hungkuno upa'nɨfijo so'no ngko Sisamne'no iyoswo ifalifaliyo mtɨ'mokumne so'no ntɨmno. 27 Ngko a'amu impo'ango mta'nɨngo sohwo Sisafepono uhwatɨmeso kakoe honɨngkano wonyomne'no iyoswo ifalifaliyo mamtɨ'mokiyo'manji oso ngko yahino hopo'maho lohono. Ose ulɨmentisofoho.